Shoqata Kulturore Shqiptare në Perg (AKV Perg) është themeluar në vitin 2019 dhe i kushtohet çështjeve kulturore, fetare dhe integruese të komunitetit shqiptar në Perg dhe rrethinë. AKV Perg disponon hapësira të veta, të cilat u përgjigjen nevojave të ndryshme të komunitetit në shumë fusha.

Aktualisht, shoqata numëron mbi 100 anëtarë aktivë.

Qëllimet

AKV Perg realizon qëllimet e saj përmes përkujdesjes ndaj anëtarëve aktivë dhe pasivë të komunitetit shqiptar në Perg dhe rrethinë. Shoqata është veçanërisht aktive në këto fusha:

• Realizimi i projekteve dhe organizimi i aktiviteteve të ndryshme për grupmosha të ndryshme
• Ofrimi i mbështetjes shpirtërore për anëtarët dhe familjet e tyre
• Nxitja e pjesëmarrjes dhe angazhimit të anëtarëve në aktivitete institucionale
• Promovimi i barazisë gjinore
• Forcimi i pluralizmit social dhe fetar, si dhe tolerancës dhe diversitetit

Komuniteti shqiptar në Austri

Shqiptarët filluan të vijnë në Austri në fund të viteve 1960 dhe në fillim të viteve 1970. Qëllimi i tyre ishte të punonin për një periudhë të shkurtër, të fitonin para dhe të ktheheshin në vendlindje për të siguruar nevojat themelore të familjeve të tyre. Me kalimin e viteve, shumë prej tyre mbetën përgjithmonë në Austri, edhe pse fillimisht planifikonin një qëndrim të përkohshëm.

Me këtë lindi nevoja për të ushtruar obligimet fetare në mënyrë të organizuar dhe për t’u organizuar edhe në aspektin kulturor. Fillimisht, shqiptarët mblidheshin nëpër banesa private, pasi atëherë nuk ishte e zakonshme që të frekuentoheshin lokalet apo kafenetë si vende takimi.

Sipas burimeve të besueshme, në vitin 1977 gjatë muajit të Ramazanit, në një barakë të Voest Alpine, u organizua një iftar i përbashkët dhe u fal namazi i teravisë në mënyrë të organizuar. Më vonë, shqiptarët filluan t’i kryenin obligimet e tyre fetare në xhamitë turke.

Me shpërbërjen e Jugosllavisë dhe gjendjen e vështirë ekonomike në trojet shqiptare, shqiptarët në diasporë – përfshirë edhe ata në Austri – filluan të organizohen për të ndihmuar vendlindjen. Sidomos gjatë Ramazanit, ata merrnin me qira lokale për faljen e teravisë dhe ftonin imamë nga vendlindja për të shërbyer gjatë muajit të shenjtë.

Në vitet 1990 u themeluan shoqatat e para shqiptare në Austri – fillimisht në Vjenë, më pas në Krems, Wels dhe në vitin 2003 edhe në Linz. Shqiptarët nga Pergu dhe rrethina më herët përdornin xhaminë turke në Mauthausen. Pas themelimit të shoqatës shqiptare “BASHKIMI” në Linz, shumë shqiptarë nga Pergu u bënë pjesë aktive e saj.

Shoqata u shndërrua në një pikëtakim të rëndësishëm për komunitetin shqiptar. Përveç aktiviteteve fetare, organizoheshin edhe aktivitete kulturore dhe sportive, prezantime politike, iniciativa sindikale, projekte për fëmijë dhe gra, si dhe aktivitete për ruajtjen e gjuhës dhe kulturës shqiptare.

Në vitin 2010 u themelua edhe një shoqatë kulturore në Perg. Anëtarët e saj ishin kryesisht turq, por edhe shqiptarë dhe myslimanë të kombësive të tjera kontribuuan në themelimin dhe funksionimin e saj. Brenda kësaj shoqate, shqiptarët filluan aktivitetet e tyre dhe më 28 nëntor 2019 themeluan shoqatën e tyre me emrin “Shoqata Kulturore Shqiptare në Perg”.

Pas shumë aktiviteteve të organizuara, pandemia Covid-19 ndikoi që edhe kjo shoqatë të ndërpriste aktivitetet e saj për një periudhë të caktuar.

Pas përfundimit të pandemisë, shoqata u angazhua për të siguruar hapësira të veta. Kjo nuk ishte e lehtë, pasi shumë pronarë nuk kishin besim të mjaftueshëm ndaj shoqatës shqiptare. Kjo situatë vështirësoi zhvillimin e aktiviteteve deri në qershor të vitit 2024, kur shoqata u zhvendos në rrugën Dr.-Schober-Straße.

Pas pushimit veror, shoqata rifilloi aktivitetet e saj të shumta dhe vazhdon të zhvillohet në mënyrë aktive.

Sot, shoqata numëron rreth 100 anëtarë aktivë dhe ofron shumë shërbime dhe aktivitete për komunitetin. Falë hapësirave të përshtatshme dhe angazhimit të stafit dhe vullnetarëve, shoqata ka kushte optimale për zhvillimin e saj të mëtejshëm.

Që nga qershori 2024 shoqata është regjistruar edhe si xhami duke ju bashkangjit xhamive shqiptare dhe Komunietit Shqiptar Musliman në Austri (ALKIG) me emrin ALKIG-Perg ku falen pesë kohët e namazit dhe mbahen të gjitha aktivitetet dhe ceremonit fetar.